Nabalaka ang mga nagapamasura sa sanitary landfill sa Calajunan, Mandurriao sa tion nga ipauntat na ang operasyon sini.
Ini may kaangtanan sa 10-year operational period sang landfill nga magatakop na sa 2026 matapos ang 10 ka tuig humalin sang ginbuksan ini sang 2016.
Buslan ini sang tukuron nga pinakauna nga waste to energy project sa Ingore, La Paz.
Sa interview sang Bombo Radyo kay Lilia Animas, kun mag-untat gid ang operasyon sang landfill, mapilitan na lang ini nga mag-untat man sang pagpamasura.
Dako naman ang pasalamat sini nga paagi sa pagpamasura, napatapos niya sa pagtuon ang iya kabataan gani nasiguro man sini nga saguron siya sang iya kabataan kun wala na siya sang obra.
Sa interview sang Bombo Radyo kay Barangay Kagawad Efrain Tagaytayan, iya ginpahayagan nga nakasugilanon sila kay General Services Office head Neil Ravena sa kun ano ang matabo sa mga pumuluyo nga nagapangbasura.
Suno kay Tagaytayan, nagpasalig man si Ravena nga indi pagpabay-an ang maapektuhan nga mga pumuluyo.
Nahibaluan nga kapin sa 200 ka mga pumuluyo sa Calajunan ang nagapamasura bilang palangitan-an.
Sa tion nga matapos ang proyekto sa Ingore, makasarang ini magproseso sang 475 tons sang solid waste per day.
Ini maka- produce sang tubtob 3.5 megawatts sang power agud mag- augment sa 10 megawatts para sa tukuron nga desalination plant nga sarang naman mag-produce sang water supply sa mas manubo nga cost para sa consumers.
