Nagpaathag si Alyas “May-may” kaangot sa ila nangin status sang iya live-in partner nga gintiro-patay sang iya man anay karelasyon sa Sitio Riles, Brgy. Lanag, Sta. Barbara, Iloilo.
Si Alyas “May-may”, 42, ang residente sang nasambit nga lugar, may pito ka mga kabataan.
Ang biktima nga si Rodito Celis Jr., 44, residente sang Brgy. Omambog, Sta. Barbara amo sa subong ang karelasyon ni Alyas “May-may”, apang may asawa man nga yara sa abroad kag may anak.
Samtang ang suspek naman nga si Ronald Susvilla, 45-anyos residente sang Brgy. Dalid, Sta. Barbara ang anay live-in partner ni Alyas “May-may”, may asawa man nga yara sa abroad kag may anak.
Sa interview sang Bombo Radyo kay Alyas “May-may”, iya ginpahayag nga antes paman siya nakitgbulag kay Ronald, Septyembre pa lang nakapa-blotter na ini sa ila barangay.
Suno kay May-may, ginpakilala pa sang suspek ang biktima sa mga kabataan niya nga si Rodito na ang ila mangin bag-o nga amay.
Gin-athag man sini nga Enero sang nagkitaay ang banas si Ronald kag si Rodito kon sa diin, nagsapolay pa ang duha sa ila puluy-an.
Ginpahayag man ni May-may nga Septyembre pa lang, may ideya na si Ronald nga magabulag na siya bangud man sa ginpa-blotter sini sa ila barangay bangud man sa indi pag-intindihanay kon sa diin, ginpabutyag man sini nga nabaton na sang suspek nga kinahanglan na niya magbulag.
Ginsaysay man sini nga ang nagdesisyon nga mag-istar sa ila puluy-an si Rodito, amo si Ronald.
Ginklaro man sang natungdan nga naga-istoryahanay man sila sang anay asawa sang iya bag-o karelasyon nga si Rodito antes pa man natabo ang insidente.
Una naman nga ginbuyagyag ni Alyas May-may nga indi nangin maayo ang pagtratar ni Ronald sa ila nga kabataan.
Nagpanawagan naman si Maymay kay Ronald nga magsungka na agud atubangon ang iya nga kasal-anan sa ngalan sang ila nga mga kabataan.
