Nagapati ang anay legal adviser ni former President Rodrigo Duterte nga si Atty. Salvador Panelo nga isa ka ‘political game’ ang ginahimo sang mga mamalidha sang House of Representatives batok kay Vice President Sara Duterte.
Sa interview sang Bombo Radyo kay Atty. Panelo, iya ginpahayag nga para sa iya, wala sang iregularidad sa mga nahimo ni VP Sara Duterte kaangot sa mga alegasyon nga korapsyon sa pagpamuno sini sa Department of Education (DEPED) kag sa Office of the Vice President (OVP).
Suno kay Panelo, tuyo lamang nga gub-an sang administrasyon ni President Ferdinand “Bong-bong” Marcos si Inday Sara ilabi na nga siya ang ginalantaw nga mangin mainit nga kasumpong ni House Speaker Martin Romualdez.
Ika-duha, ang impeachment ang agud i-disqualify si Duterte bangud siya ang mabaskog nga kandidato para sa 2028 Presidential Elections.
Ginalantaw man sini nga planado na ini tanan antes paman nagbinotohay sa Kamara ang mga mamalidha.
Ginhatagan man pagtamod ni Panelo ang kahandaan sang kampo ni Vice President Sara Duterte sa pag-atubang sa impeachment trial batuk sa iya.
Suno kay Panelo, preparado ang legal team ni VP Sara sa magamo nga hearing, kag sigurado nga atubangon niya ini nga may yuhum, kaisog, kag bastante nga ikasarang.
Kadungan sini, ginpakalain man sang former spokesperson ni anay Pres. Duterte nga wala ginarespeto sang mga mamalidha ang tingog sang pumuluyo kag ang hingyo ni Pres. Ferdinand Marcos Jr. nga untaton ang amo nga lihok bangud magatuga lamang ini sang pagbinahin-bahin kag indi makabenepisyo sa mga Pilipino.
Ginpahayag man sini nga ginalauman na nga pulihan si VP Sara kag indi na ini bag-o ang pagdali-dali sa proseso bangud may yara sang bastante nga numero ang ginapahayag ‘anti-forces’.
