Nanindugan si President Ferdinand ‘Bongbong’ Marcos, Jr. nga wala siya sang kahilabtanan sa pag-impeach sang Kamara sa iya anay runningmate nga si Vice President Sara Duterte.
Suno kay Marcos, wala sang papel nga gintungdan ang executive branch sa sini nga proseso.
“The executive cannot have a hand in the impeachment. Walang role ang executive sa impeachment,” pahayag sini sa press briefing, Pebrero 6.
Kun balikan, Nobyembre 2024 sang ginkumpirma ni Marcos nga nagpadala siya sang text message sa mga kongresista nga nagasiling nga indi pagdayunon ang pag-file sang impeachment complaint batok kay Sara. Ginsiling sini anay nga “unimportant” man si Sara kag indi nagakabagay nga usikan sang tyempo sang Kongreso.
Apang dugang ni Marcos subong, sang na-file na ang impeachment complaints sa lower chamber, wala na sang pilian ukon wala na sang opsyon ang Kongreso bangud nga trabaho nila nga aktuhan ini nga reklamo base sa nakasaad sa Konstitusyon.
“Once the impeachment complaints were filed, they have no choice. The House has no choice, the Senate has no choice but to act on the complaints, and that is exactly what happened,” pahayag sini. “Nakatali na ang kamay nila, they have to do this.”
Ginpahayag man sini nga kun mag-umpisa na ang impeachment proceedings, magalantaw lamang siya, wala sang siya sang papel diri, kag wala sang mangin representasyon halin sa Executive.
“From this point on, I’m just a very interested observer. I will not be part of it. There will be no representation from the Executive, why should there be? We leave it to the wisdom of the Senate to exercise their wisdom,” dugang sini.
Sa plenaryo sa Kamara sang Myerkules, 215 sa 306 ka mga mamalidha ang nag-suporta sa bag-o nga impeachment complaint batok kay Duterte nga amo ang rason sa pagpasaka sini nga reklamo sa Senado para sa trial nga posible maga-resulta sa pagkakas kay Sara sa pwesto.
Base sa House resolution, nagkomiter si Sara sang “violation of the constitution, betrayal of public trust, graft and corruption, and other high crimes”.#
