Nagpaandam ang isa ka ahensya sang United Nations nga masobra sa anum ka milyon ka mga tawo ang mapatay bangud sa Human immunodeficiency virus (HIV) kag acquired immunodeficiency syndrome (AIDS) sa masunod nga apat ka tuig kun dalayon nga untaton sang Trump administration ang pondo para diri nga mga programa.
Kaangot ini sa mandu ni US President Donald Trump nga indi anay paghulagon ang ginatos ka milyon nga dolyar nga balor sang foreign aid donations sa sulod sang 90 ka adlaw. Ang order nga ini ang ginpaguwa sang Enero 20 nga amo ang una nga adlaw sang pagbalik ni Trump sa White House.
Pagkasunod nga adlaw, may waiver nga gin-isyu ang US State Department para sa President’s Emergency Plan for AIDS Relief (PEPFAR) nga amo ang nagapanguna nga HIV initiative sa kalibutan nga kilala sa life-saving humanitarian assistance.
Apisar nga gin-abi-abi sang United Nations AIDS agency ang waiver, ginpahayag sini nga mabudlay gihapon ang sitwasyon para sa ila ilabi na bangud indi klaro kun ano ang matabo sa sunod sa treatment programs.
Suno kay UNAIDS deputy executive director Christine Stegling, may nakit-an sila nga disruption sang delivery sang treatment services.
Sa tunga sang pagnubo sang pondo, nagpaandam ini nga may matabo nga 400% nga pagsaka sa kamatayon bangud sa AIDS kun indi pa mahatagan sang otoridad ang PEPFAR financial support sa tunga sang 2025 kag 2029.
Katumbas ini suno sa iya sang 6.3-million ka mga tawo. Sa Ethiopia halimbawa, may 5,000 ka public health worker contracts kun sa diin ginakuha ang pondo sa US assistance, kag tanan ini subong ang na-terminate.
Ang pinakadaku nga nagapangatubang sang interruption amo ang community clinics bangud tuman ini nga nagasalig sa pondo nga ihatag sang Estados Unidos.
“That’s 6.3 million people, 6.3 million AIDS-related deaths that will occur in future…Any penny, any cut, any pause, will matter for all of us”, pahayag sini samtang nagapanawagan sa UN member states nga mag-abante na kag maghimo sang tikang kaangot sa isyu.
Nahibaluan nga ang donasyon sang Estados Unidos amo ang pinakadamo para sa global funding para sa UN program nga naga-operate sa 70 ka mga pungsod.
Una na nga ginpahayag sang Trump administration nga ginarepaso sini ang foreign-aid programs kun nagasanto bala ini sa iya polisa nga “America First.”
