Makig-angot ang Philippine Basketball Association (PBA) sa National Bureau of Investigation (NBI) kasunod sang death threats nga nabaton sang Barangay Ginebra rookie nga si RJ Abarrientos.
Suno kay Commissioner Willie Marcial, magahulag ang liga kaupod ang NBI para nga ma-imbestigahan ang amo nga mga pamahog nga ginpadala kay Abarrientos kag sa iya nga partner paagi sa social media.
Lakip sa nabaton sini nga mensahe amo ang pamahog nga tiruhon siya.
Base sa nagpadala sang mensahe, nadulaan ini sang daku nga kantidad sang kuwarta bangud sa pusta matapos nga nalutos ang Ginebra sa skor nga 108-104 batok sa Meralco sa Game 2 sang quarterfinals.
Sang amo nga tion, nahatagan sang oportunidad ang 25-anyos nga star guard nga mapasulod kuntani ang kuatro puntos kag matas ang skor sang nagahingapos na ang hampang apang wala natigayon tubtub nga nagdaog ang Bolts.
Naka-istorya naman si Commissioner Marcial sa Ginebra team management kaangot sa amo nga isyu.
Matandaan nga si Abarrientos mismo ang nag-post sa death threats nga iya nabaton para sa ihibalo sang publiko kag naghingyo man nga i-report ang account. Ginpaathag man sini nga nagahampang sila sang maayo, nangin trabaho na nila ini, apang parte gid sang basketball nga malutos.
