Nakapauli na sa ila pamilya ang lima ka Thai nationals matapos 15 ka bulan man nga ginbihag sang Hamas militants sa Gaza.
Si Thai Foreign Minister Maris Sangiampongsa ang nag-upod sa lima halin sa Israel tubtub natabo ang emosyonal nga reunion sa ila tagsa ka ka pamilya sa Suvarnabhumi Airport sa Bangkok.
Base sa Israeli authorities, sa 240 ka mga tawo nga ginkidnap sang Hamas sang Oktubre 2023, 31 ang Thai nationals nga amo ang pinakadaku nga grupo sang foreigners nga nangin hostage sa Gaza.
Sang amo man nga tuig, 41 ka iban pa nga Thais ang ginpangpatay sang militante nga grupo, apang antes nagtakop ang 2023, nabuy-an ang 23 ka kaupdanan nila paagi sa negosasyon sang Thailand kag Hamas nga may assistance halin sa Qatar kag Iran.
Antes ang gyera sa Gaza, 30,000 Thai laborers ang nagatrabaho sa sector sang agrikultura sa Israel nga amo ang nagahimo sa ila bilang isa sa pinakadaku nga migrant worker groups sa amo nga pungsod sa Middle East. Kasunod naman sang pag-ibwal sang gamo, 9,000 sa ila ang nagpauli.
Sa subong may isa pa ka Thai national nga ginapatihan nga gin-bihag man sang Hamas. Nagalaum ang otoridad nga madala man ini pauli lakip na ang bangkay sang duha ka Thai hostages.
