Samtang naga-amat-amat na sako ang gift shopping para sa Valentine’s Day, nagpaandam ang toxics watchdog nga EcoWaste Coalition batok sa pagbakal sang perfumes nga nagaunod sang ginadumilian nga toxic chemicals.
Kasunod ini sang market surveillance sang grupo kun sa diin ginpahayag nga may nakit-an sila nga 35 perfume products halin sa 16 brand nga may yara sang ingredient nga butylphenyl methylpropional (BMHCA) ukon kilala man nga lilial ukon lysmeral.
Suno sa watchdog, ang pagbaligya sini nga produkto ang nagalapas sa Food and Drug Administration (FDA) Circular No. 2023-007 nga amo ang naga-ban sa amo nga chemical sa cosmetics.
Delikado ini suno sa grupo bangud mahalitan sini ang reproductive process ilabi na ang lapsag nga yara sa taguangkan sang isa ka iloy. Magluwas sa reproductive toxicity, makatuga man ini sang endocrine disruption kag allergic reactions.
Base pa sa EcoWaste Coalition, sa ila test buys, natukiban nga ang banned perfumes ang ginabaligya sa balor nga P75 to P300 sa major shopping hubs sa Makati, Manila, kag Quezon City. Ini nga mga produkto ang ginabug-usan sang eau de parfum, eau de toilette, fragrance lotion, fragrance mist, kag body mist kag nagaguwa nga mga imitation items lamang.
Gin-report na ang findings sa FDA kag nagpanawagan man sa otoridad nga maghulag na batok sa importers, distributors, kag retailers sini nga banned products.
