Gintawag ni Former Iloilo City Councilor Plaridel Nava nga ‘animal kag iskandaluso nga kontrata’ ang ginpirmahan nga joint venture agreement ni Former Iloilo City Mayor Jed Patrick Mabilog sa tunga sang syudad kag Double Dragon Properties Corporation kaangot sa Guimaras-Iloilo Ferry Terminal (GIFT) Project.
Ang issue nagtuhaw kasunod sang renegotiation nga ginaduso ni Iloilo City Mayor Jerry Treรฑas kag sa nasambit nga korporasyon.
Sa interview sang Bombo Radyo kay Former Councilor Nava, iya ginpahayag nga sa ila pagdihon sa amo nga agreement, wala sila nahatagan sang kopya sini.
2012 sang ginpirmahan ni Mabilog ang agreement nga nagahatag sa Double Dragon Properties sang eksklusibo nga 25 ka tuig nga kinamatarong sa pagdevelop kag pag-operate sang 13,000-square-meter terminal complex.
Suno kay Nava, ang tikang ang isa ka ‘shocking to human senses’ rason nga nag-apelar siya sa konseho nga i-review ini, kon sa diin, nag-file siya sang resolusyon sang Hunyo 2013 agud bawion ang otoridad ni Mabilog nga magpirma sa joint venture agreement.
Natigayon naman nga napasar ang resolusyon apang liwat nga nabalik ang otoridad kay Mabilog kasunod sang iya nga pagpahingyo sa konseho.
Gindala naman sini sa ombudsman ang agreement bangud wala ini nag-agi sa insakto nga bidding nga mahimo paglapas sa graft and corruption.
Nagapati ang natungdan nga ang agreement ang wala nagtuga sang development sa Parola Wharf bangud naka-focus lamang sa business kon sa diin, mas dako pa ang shopping mall kon ikumpara sa wharf.
Gin-athag man sini nga indi pagpamulitika ang tikang nga ginaduso subong ni Mayor Jerry Treรฑas bangud parte ini sang ‘public interest’.
Nahibaluan, nga sang si Nava ang councilor, nagboto ini pabor sa amo nga agreement bangud sa amo nga tion, gahingyo siya sang anay alkalde nga buligan.
Apang subong, para sa iya, unfair kag tuman ka lugi ang syudad sa amo nga agreement.
Kon balikan, nakasaad sa anay agreement ang 25 year exclusive rights sa pagkolekta sang terminal, berthing and cargo fees, kag ang pagparenta sang mga commercial spaces sa terminal complex.
Sa idalom sang JVA, ang bahin sang syudad naglakip sang 1-5% sang kita sa gross terminal fee, 1% sang gross berthing fee revenues, 1% sang gross cargo fee revenues, kag 1% sang gross rental revenue (wala labot ang VAT).
