Nagpahanumdom ang Commission on Elections (COMELEC) Iloilo City sa mga barangay officials nga dapat magpabilin nga non-partisan ukon indi maghilabot sa 2025 midterm elections.
Sa interview sang Bombo Radyo kay Mr. Jonathan Sayno, Election Assistant II sang Iloilo City COMELEC, iya ginpahayag nga ang madakpan nga nagabulig pangtakod sang mga tarpaulins sang kandidato ang mahimo pasakaan sang nagakaigo nga kaso.
Lakip na diri ang paglapas sa Republic Act No. 9006 ukon An Act to Enhance the Holding of Free, Orderly, Honest, Peaceful and Credible Elections Through Fair Election Practices.
Suno kay Sayno, kon mapamatud-an nga naglapas ang isa ka barangay official, mahimo ini dagdagan sang perpetual disqualification to hold a public office.
Antes magsugod ang local campaign period, hatagan sang 72 hours ang tagsa ka barangay agud kakson ang mga tarpaulins nga nakaspaskil sa ila tagsa ka barangay hall.
Dugang pa ni Sayno nga ang tanan nga tarpaulins nga wala sa designated area ang ginakabig nga iligal.
