Indi magnubo sa 13 ang pilason matapos nga natumba ang isa ka jeep sa Barangay Canawili, Janiuay, Iloilo.
Sa interview sang Bombo Radyo kay Police Staff Sergeant Glen Rapita, imbestigador sang Janiuay Municipal Police Station, iya ginpahayag nga nagaunod sang 15 ka mga pasahero ang sakay sang jeep sang nagluntad ang insidente.
Suno kay Rapita, gilayon nga gindala sa ospital ang mga biktima agud nga malapatan sang nagakaigo nga pagbulong kag sa subong, yara na sa maayo nga kahimtangan.
Samtang ang nabilin naman nga duha nga wala napilasan, wala na gindala sa ospital.
Ginpahayag man sini nga nagapaliko ang jeep sa dalan kag mahimo nga napatay ang makina rason nga nadulaan sang control ang driver kag nagbaliskad ang jeep.
Ginwarik naman sang driver ang manobela agud mabunggo sa nabukid nga parte sang dalan kag indi na magdalusdos pa.
Ginalantaw man sang otoridad ang mataas nga dalan nga posible factor man sa pagkapatay sang makina sang jeep.
