Ginbuyagyag sang Pavia Municipal Police Station nga ang isa sa tatlo ka person of interests nga ila ginasundan sa papang-holdup sang fuel tanker sa Hibao-an, Pavia, Iloilo ang aktibo nga nagatrabaho sa Metro Iloilo Transport Service Cooperative (MITSCOOP).
Sa interview sang Bombo Radyo kay Police Lieutenant Gabriel Manguera, Deputy Chief of Police sa Pavia Municipal Police Station, iya ginpahayag nga padayon ang ila pagsunod sa mga lugar nga mahimo ginkadtuan sang mga suspek matapos nga nang-holdup.
Suno kay Manguera, gina-monitor sang ila talatapan ang lugar nga mahimo ginhalinan sang duha ka mga suspek bangud dako ang posilibidad nga nagkitaay sila antes ginhimo ang pagpang-holdup.
Gin-ako man sini nga wala sang closed circuit television ukon CCTV sa isa ka barangay nga posible gin-agyan sang suspek agud magpalagyo.
Nagpasalig man ang natungdan nga gilayon magapasaka sang kaso kon matumod ang identity sang tatlo.
Kon balikan, pasado las-9 sang gab-i sang Pebrero 10, 2025 sang ginabaybay sang fuel tanker ang dalan halin sa Brgy. Balabag, Pavia, kag sang nakalab-ot na ini sa Gorriceta Avenue, may nagbalabag na sa iya nga isa ka Mitsubishi mirage.
Naka-cover pa sang conduction sticker ang plater number sang salakyan sang suspek.
gintayaan sang pusil ang driver sang tanker truck kag ginkuha ang bag nga naga-unod sang kwarta nga indi magnubo sa P300,000.
Gilayon naman nga nagpalagyo ang Mitsubishi mirage lakip na ang motorsiklo nga ginalantaw man nga kaupod sang nang-holdup.
Nahibaluan nga magarahe na kontani ang tanker sa C1 Road sa Brgy. Pandac, Pavia kon sa diin, 150 meters na lang ang kalayuon sini antes makalab-ot sa amo nga garahe.
