Nagapati ang isa ka supporter sang Alyansa para sa Bagong Pilipinas nga may maayo nga plataporma ang mga gina-endorso nila nga mga senatorial candidate.
Sa interview sang Bombo Radyo kay Ergie Tabaguera, isa sa mga taga-suporta sang nasambit nga grupo, iya ginpahayag nga temprano pa siya naghimos agud nga makapadulong sa Gaisano Iloilo City Center sa Benigno Aquino Ave., Diversion Road, Mandurriao, Iloilo City.
Suno kay Tabaguera, tuman ka importante nga mabatian ang ila plano para sa pungsod agud makapanghinun-anon ang mga botante sa ila botohon.
Ginpahayag man sini nga sadto pa lang, loyalista na sang pamilya Marcos ang iya amay kag iloy kon sa diin, ginsundan man sini ang amo nga tikang.
Nagalaum man ang natungdan nga matuman sang mga kandidato ang ila promisa sa pumuluyo.
Nahibaluan nga naghalin pa sa Barotac Viejo, Iloilo ang natungdan kag isa sa 60 ka indibidwal sa tagsa ka barangay nga nagpadulong sa kahiwatan.
