Ginaplano ni senatorial candidate Manny Pacquiao nga iduso ang maayo nga economic enterprise sang pungsod kon makapungko siya balik bilang senador.
Sa interview sang Bombo Radyo kay former senator Pacquiao, iya ginpahayag nga tutokan sini ang economic enterprise sang pungsod agud mapabaskog ang Micro, Small and Medium Enterprises (MSME) bangud para sa iya, importante nga may palangitan-an ang mga Pilipino.
Suno kay Pacquiao, napili sini ang amo nga plataporma bangud naagyan sini ang tuman ka pigado nga pagpangabuhi ilabi na kon wala sang palangitan-an.
Ginpahayag man sini nga kon matigayon matuman ang plano, magaserbe ini nga source of income para sa tagsa ka pamilyang Pilipino.
Nagapati man ang natungdan nga isa ka paagi ang tikang agud nga masustener ang livelihood sang mga Pinoy nga mahimo mapuslan man sang masunod pa nga henerasyon.
Nahibaluan nga si Pacquiao ang nagpapili sa pagka-presidente sang 2022 kon sa diin, nagtapos ini sa ika-tatlo nga pwesto kag nakakuha sang 3.6 million nga boto.
