𝗜𝗟𝗢𝗜𝗟𝗢 𝗖𝗜𝗧𝗬 – Ginakwestyon sang isa sa mga konsehal sa tion sang Mabilog administration ang ‘timing’ sang ginaduso nga renegotiation sa joint venture agreement para sa lloilo Ferry Terminal sa Parola Wharf.
Ang kasugtanan nga ginpirmahan sang 2012 nanday former Iloilo City Mayor Jed Patrick Mabilog on behalf sa Iloilo City Government kag Ferdinand Sia, nga nagtiglawas sa duha ka korporasyon nga Double Dragon Properties Corporation (DDPC) kag corporation sa Parola.
Sa interview sang Bombo Radyo kay former Iloilo City Councilor Atty. R Leone Gerochi, anay Chairman sang Committee on Transporation sa Iloilo City Council, iya ginpahayag nga sang ginpatukod ang nasambit nga wharf, si Mabilog ang nagapungko nga alkalde.
Sang 2012, si Iloilo City Mayor Jerry Treñas ang nagapungko sadto bilang Representative sa Lone District sang Iloilo City.
Suno kay Gerochi, sang amo nga tion, magka-upod pa sa partido sanday Mabilog kag Treñas kag wala man sang may nagkwestyon sa kasugtanan.
Apang sa subong nga nagbungkag na ang ila tandem, gulpi lang nga ginbukad liwat ang joint venture agreement.
Maathag suno sa anay konsehal nga may lamod pamulitika ang pagkalkal sa pila ka mga provisions sang kontrata nga ginapahayag indi pabor sa syudad.
Nahibaluan nga aprubado naman sang Iloilo City Council ang resolution nga nagahatag sang gahom sa City Legal Office agud pangunahan ang renegotiation sa DDPC.
Mangin si Treñas ang nagpahayag naman sang suporta sa renegotiation, sa diin ginpunto sini nga dapat magpabor sa syudad ang kontrata.
Isa sa mga nagapanguna nga concern sa nasambit nga isyu amo ang revenue share sang syudad sa terminal nga yara lang sa one percent sa gross terminal income ukon P200,868 kada tuig sa sulod sang 25 ka tuig.
Ginalantaw naman nga dehado diri ang syudad nga amo ang nagapanag-iya sang 10,687-square-meter nga duta sa diin nahamtang ang terminal.
Ang balor sang duta sang syudad ang nagtaas na halin sa P51.65 million sang 2012 kag nangin P183.35 million sang 2024, samtang ang commercial building nga gintukod sa terminal ang nagabalor sang P105.66 million.
Ginsaway man sang syudad ang pagpatuman sang kasugtanan sa rason nga kulang ini sa transparency sa diin wala nalakip sa proposal sang korporasyon ang pagtukod sang commercial buildings kag wala man sang master development plan nga requirement sa idalom sang joint venture agreement.
Natukiban man nga wala nagapasa ang korporasyon sang annual reports sa project operations, nga requirement man sa kasugtanan.
Kaangot sini, nagdepensa naman si Mabilog nga ang 2012 joint venture agreement ang makabenepisyo sa syudad sang amo nga tuig sa diin indi pa ini makabig nga ‘booming economic hub’.
Gin-athag man sang anay alkalde nga wala naggasto ang syudad sang bisan isa ka sentimo ukon nag-loan para sa nasambit nga proyekto.
