Gin-ako ni Miagao, Iloilo Vice Mayor Macario Napulan nga iya ginkakibot nga gina-demolish na ang pila ka parte sang Municipal Stage kag Basketball Court sang Miagao.
Sa interview sang Bombo Radyo kay Vice Mayor Napulan, iya ginpahayag nga ang tikang ang isa ka demolisyon sa historical kag cultural identity sang banwa sang Miagao.
Suno kay Napulan, sang ginpadulongan sini ang lugar, gina-jack hammer na ang mga bleachers sini.
Ginpahayag man sini nga ang entablado nangin hipos nga saksi sang pinakaimportante nga mga hilikuton nga nagpadalom sang paghiusa kag pag-abyanay sang mga tawo gikan sa nagkalainlain nga relihiyoso nga pagpati kag politikal nga mga ideolohiya.
Gintuad man sang natungdan nga wala siya nakahibalo lakip na ang municipal council sa amo nga tikang nga ginaduso sang administrasyon ni Mayor Engr. Richard Garin.
Ginbuyagyag man sini nga wala sang public hearing nga ginpatuman ang munisipyo antes ginduso ang demolition job.
Gintuad man ni Napulan nga sang nagligad nga tuig nag-request si Mayor Garin nga i-redesign ang plaza lakip na ang munisipyo nga nagabalor P3 million kada area.
Para kay Napulan, pabor siya sa development apang, indi lang paggub-on ang kabilogan sang structure agud mapabilin ang cultural identity sang tagsa ka Miagawanons.
Nagapanindugan naman si Miagao, Iloilo Mayor Richard Garin nga wala sang ginalapas ang munisipyo sang Miagao sa patag sang cultural heritage kaangot sa pagpatukod sang Municipal Stage kag Basketball Court sa amo nga banwa.
Ini kasunod man sang pagpabutyag sang pagkadismaya ni Vice Mayor Macario Napulan sa amo nga proyekto.
Suno Mayor Garin, kinahanglan anay mahibaluan ni Napulan ang insakto nga cultural heritage.
Suno kay Garin, atop lang ang gindugang kag wala ini nalakip sa cultural landmark sang banwa.
Gin-athag man sini nga wala gintandog ang stage sang munisipyo kag kon maigo ini sang roofing sang basketball court, mahimo nga i-transfer ini.
Ginpatpat man ni Garin nga ang cultural property sang banwa ang ginalakipan sang duha ka Spanish Era canyon, ang Rizal monument, ang Britanico Cultural Hall, Historical books, mga hablon sang banwa kag lakip na ang Municipal plaza.
Indi man magpati ang natungdan nga wala nakahibalo si Vice Mayor Napulan sa ila proyekto bangud sang tinalikdan pa nga tuig ini gina-istoryahan.
Ginklaro man ni Garin nga wala sang pagpangguba nga himuon sa mga istruktura kag lunsay isaylo lamang.
Pabor man ang alkalde sa nangin pahayag ni Napulan nga indi pagtugutan ang isa ka tawo nga wala makahangop sang existence sang mga Miagawanon nga panason ang mismo identity nga ginbilin sang mga katigulangan.
