Ginklaro sang Committee on Transportation sang Iloilo City Council nga wala sang lamod sang pulitika ang ginpatuman nga imbestigasyon sa joint venture agreement sang city government kag Double Dragon Properties Corporation kaangot sa Guimaras Iloilo Ferry Terminal (GIFT) Project.
Sa interview sang Bombo Radyo kay City Councilor Sedfrey Cabaluna, Chairman sang Committee on Transportation sang City Council, iya ginpahayag nga natukiban sa imbestigasyon sang komitiba nga nadala sa exclusivity sang joint venture agreement nga indi mahimo nga dungkaan ang wharf tubtob sa bahin sang Ortiz, City Proper.
Suno kay Cabaluna, indi man fair kag enough ang share nga mabaton sang syudad sa amo nga agreement.
Ginpahayag man sini nga indi lang man siya ang naghambal nga ‘disadvantageous’ ang tikang kundi pati man ang kabug-usan sang komitiba.
Gin-athag man sang natungdan nga wala nadala ang anay administrasyon ni Former Mayor Jed Patrick Mabilog sa imbestigasyon kag kontrata lamang sang joint venture ang ginapadalman.
Ginpahayag man sini nga kinahanglan i-renegotiate ang agreement bangud tuman ka disbentaha sa bahin sa city government.
Ang letter sang renegotiation ang mangin epektibo 60 days sugod mabaton sang City Legal Office kag Double Dragon Properties Corp.
Nahibaluan nga halos duha ka tuig matapos gin-umpisahan ang pagrepaso liwat sang Joint Venture Agreement (JVA) para sa Guimaras-Iloilo Ferry Terminal Services (GIFTS) sa Parola Wharf.
Ginpirmahan sang 2012 sa panahon sang administrasyon sadto ni Mayor Jed Patrick Mabilog, ginhatagan ang Double Dragon Properties Corp sang eksklusibo nga 25 ka tuig nga kinamatarong sa pagdevelop kag pag-operate sang 13,000-square-meter terminal complex.
Ang Joint Venture ang nagahatag sa Double Dragon sang 25 year exclusive rights sa pagkolekta sang terminal, berthing and cargo fees, kag ang pagparenta sang mga commercial spaces sa terminal complex.
Sa idalom sang JVA, ang bahin sang syudad naglakip sang 1-5% sang kita sa gross terminal fee, 1% sang gross berthing fee revenues, 1% sang gross cargo fee revenues, kag 1% sang gross rental revenue (wala labot ang VAT).
