Padayon nga nagabyahe sa Metro Iloilo Transport Service Cooperative (MITSCOOP) ang isa sa tatlo ka person of interests nga ginasundan sang Pavia Municipal Police Station sa papang-holdup sang fuel tanker sa Hibao-an, Pavia, Iloilo.
Sa interview sang Bombo Radyo kay Juvy Barreto, Vice Chairman sang Metro Iloilo Transport Service Cooperative, iya ginpahayag nga nakit-an sa closed circuit television (CCTV) nga ang isa sa mga suspek nga nagasakay sa motorsiklo ang kumpirmado nga driber sang ila kooperatiba.
Suno kay Barreto, madugay na nga nagatrabaho sa ila ang amo nga driver kon sa diin indi magnubo sa anom ka bulan.
Ginbuyagyag man sini nga nakabyahe pa ang amo nga driver sang nagluntad ang pagpang-holdup.
Ginpatawag naman ini sang Pavia Municipal Police Station agud nga maimbestigaran kag mausisa.
Kon balikan, pasado las-9 sang gab-i sang Pebrero 10, 2025 sang ginabaybay sang fuel tanker ang dalan halin sa Brgy. Balabag, Pavia, kag sang nakalab-ot na ini sa Gorriceta Avenue, may nagbalabag na sa iya nga isa ka Mitsubishi mirage.
Naka-cover pa sang conduction sticker ang plater number sang salakyan sang suspek.
Gintayaan sang pusil ang driver sang tanker truck kag ginkuha ang bag nga naga-unod sang kwarta nga indi magnubo sa P300,000.
Gilayon naman nga nagpalagyo ang Mitsubishi mirage lakip na ang motorsiklo nga ginalantaw man nga kaupod sang nang-holdup.
Nahibaluan nga magarahe na kontani ang tanker sa C1 Road sa Brgy. Pandac, Pavia kon sa diin, 150 meters na lang ang kalayuon sini antes makalab-ot sa amo nga garahe.
