Ginhingyo ni Lanao del Sur Rep. Zia Alonto Adiong sa National Bureau of Investigation (NBI) nga imbestigaran ang damlag lang nga pahayag ni anay Presidente Rodrigo Roa Duterte angot sa pagpatay sa 15 ka mga senador agud makapungko ang ila mga kandidato.
Suno kay Adiong, kun ginlunsar sang NBI ang imbestigasyon sa ginaalegar pamahog ni Vice President Sara Duterte batok kay President Ferdinand Marcos Jr., First Lady Liza Araneta-Marcos, kag Speaker Ferdinand Martin Romualdez, nagakabagay lamang nga usisaon man ang mga pahayag sang anay presidente.
Sa isa ka pagtililipon sa syudad sang San Juan, ginhambal ni Duterte angot sa palaabuton nga eleksyon kag sa karon nga komposisyon sang Senado.
Sa iya pamulong-pulong, ginduso niya ang isa ka radikal nga paagi agud masiguro nga ang iya mga kaalyado nga mga kandidato magadaug.
Ang iya pahayag ginsugata sang mabaskog nga pagdayaw gikan sa iya mga sumalakdag, nga dungan nga nagsinggit, “Kill! Kill! Kill!”
Ginhatagan pagtamod ni Adiong nga indi dapat pagbalewalaon ang kaangay nga mga pahayag, ilabi na nga may mga instances nga nag-akto ang mga supporters ni Duterte sa iya mga tinaga.
Ginhatagan niya pagtamod nga bisan pa nga mahimo mag-insister si Duterte nga ang iya mga tinaga isa lamang ka joke, “indi niya matago ang pamahog sa mga senador sa likod sang joke.”
Bangud sini, gin-engganyo sini ang NBI nga usisaon kon ang amo nga mga pahayag, ilabi na ang nagapatuhoy sa violence, ang sakop sang nagakaigo nga mga kasuguan.
