𝗜𝗟𝗢𝗜𝗟𝗢 𝗖𝗜𝗧𝗬 – Ginbuyagyag ni former Iloilo City Councilor Plaridel Nava II ang natabo kun nga naaprubahan sang joint venture agreement para sa lloilo Ferry Terminal sa Parola Wharf sa tion sang Mabilog administration.
Ang kasugtanan nga ginpirmahan sang 2012 nanday former Iloilo City Mayor Jed Patrick Mabilog on behalf sa Iloilo City Government kag Ferdinand Sia, nga nagtiglawas sa duha ka korporasyon nga Double Dragon Properties Corporation (DDPC) kag corporation sa Parola.
Sa interview sang Bombo Radyo kay Nava, iya ginpahayag nga sang 2012, gin-pressure sila ni Mabilog nga hatagan siya sang otoridad nga magpirma sang kontrata apisar nagapamalabag ini.
Suno kay Nava, nagpangakig si Mabilog sang nagpamalabag ang mga konsehal sa paghatag sang otoridad sa iya rason nga nagpasugot na lang ang mga ini.
Ginpahayag ni Nava nga ginpatawag sila ni Mabilog kag ginhambalan nga may batunon man ang mga ini nga kwarta.
Ini nga scenario suno sa anay konsehal ang masami nga nagakatabo sa tion nga may mga proyekto nga ginapasulod sa syudad.
Gani, indi na makakilibot suno sa konsehal kun natabo ini sa tunga sang Iloilo City Government kag sang DDPC.
Matapos sini, ginpahayag ni Nava nga nag-file siya sang kaso nga paglapas sa RA 3019: Anti-Graft and Corrupt Practices Act batok kay Mabilog kag sa DDPC sa Office of the Ombudsman.
Sang amo nga tion si Conchita Carpio-Morales ang nagapungko nga Ombudsman kag natuon ini sa tion sang administrasyon ni former President Benigno Simeon ‘Noynoy’ Aquino III.
Apang sa ulihi, ginbasura ang kaso bangud sa rason nga nagpasugot man ang Iloilo City Council nga hatagan sang gahom si Mabilog nga magpirma sang kontrata on behalf sa Iloilo City Government.
