𝗜𝗟𝗢𝗜𝗟𝗢 𝗖𝗜𝗧𝗬 – Ginbali ni former Iloilo City Councilor Plaridel Nava II ang pahayag ni former Iloilo City Councilor Atty. R Leone ‘Boots’ Gerochi nga wala na sang bilin nga pondo ang syudad kag madamo sang utang sang natapos na ang termino ni Mayor Jerry Treñas sang 2010.
Nahibaluan nga nagpungko si Treñas bilang Representative sa Lone District sang Iloilo City sang 2010 kag nagbulos sa iya si anay Iloilo City Mayor Jed Patrick Mabilog.
Sa interview sang Bombo Radyo kay Nava, iya ginpahayag nga antes matapos ang tuig 2009, naaprubahan na ang budget para sa 2010 kag allocated na ang tanan nga pondo sang Iloilo City Government.
Hunyo 30, 2010 sang natapos na ang termino ni Treñas bilang alkalde kag Hulyo 1 sang amo man nga tuig nagbulos si Mabilog.
Ginpahayag ni Nava nga nakabaton man sang allowances si Gerochi sang nagapungko pa ini bilang konsehal nga nagapamatuod nga may pondo ang syudad.
Ginbulgar man ni Nava ang Mabilog administration ang matuod nga madamo sang utang sa diin sang 2010, nag-utang ini sang P350 million para sa Iloilo City Hall kag sang 2012, nag-utang naman ini sang P867 million nga amo ang tuig sang gin-aprubahan ang joint venture agreement para sa lloilo Ferry Terminal sa Parola Wharf.
