Nakatalana nga papanaogan sang warrant of arrest si Iloilo Public Information and Communications Affairs Office (PICAO) Head Mr. Nereo Lujan may kaangtanan sa tatlo ka counts sang cyber libel nga ginpasaka ni Iloilo City Mayor Jerry Treñas.
Sa interview sang Bombo Radyo kay Mayor Treñas, iya ginpahayag nga ang warrant of arrest ang nagaangot kay Lujan sa naguwa nga resolution sang Iloilo City Prosecutor’s Office kon sa diin, nakitaan nila sang malisya ang tatlo ka mga posts ni Lujan.
Suno kay Treñas, may intension si Lujan nga pakahuy-an siya paagi sa mga posts sini sa social media.
Ginpahayag man sang natungdan nga nagdugang siya sang walo ka counts sang kapareho nga kaso batok sa Iloilo Public Information and Communications Affairs Office Head.
Gin-athag man ni Treñas nga wala gid siya kaagi nga nagpasaka sang kaso batok sa mga media apisar sang mga akusasyon batok sa iya.
Wala man sini ginakabig nga media si Lujan apang para sa iya, indi maayo nga representasyon sa media ang ginhimo ni Lujan.
Nahibaluan nga una na nga nagpasaka sang 12 counts sang cyber libel si Treñas batok kay Lujan, kon sa diin, sa subong nakitaan ang tatlo sang grounds agud padayunon ang kaso.
