ILOILO CITY – Nanindugan si Iloilo City Mayor Jerry Treñas nga wala sang kamatuoran ang pahayag ni former Iloilo City Councilor Atty. R Leone ‘Boots’ Gerochi nga wala na sang bilin nga pondo ang syudad kag madamo sang utang sang natapos na ang iya termino.
Nahibaluan nga Hunyo 30, 2010 sang natapos na ang termino ni Treñas bilang alkalde kag Hulyo 1 sang amo man nga tuig nagbulos si anay Iloilo City Mayor Jed Patrick Mabilog.
Sa interview sang Bombo Radyo kay Treñas, iya ginpahayag nga imposible nga masipot ang pondo sang syudad bangud nagabaton man sang sweldo ang mga konsehal sa tion sang Mabilog administration.
Sang amo nga tion suno sa natungdan, nagapungko pa si Gerochi bilang konsehal.
Suno sa alkalde, indi mahimo matandog ang pondo sang Iloilo City Government kun wala sang valid nga appropriations.
Gin-athag man sini nga wala siya nagapirma sang pondo kundi ang City Administrator kag City Treasurer.
-𝗪𝗶𝘁𝗵 𝗮 𝗿𝗲𝗽𝗼𝗿𝘁 𝗳𝗿𝗼𝗺 𝗕𝗼𝗺𝗯𝗼 𝗔𝗻𝗴𝗲𝗹 𝗧𝗮𝗻
