Nagpaathag ang Sangguniang Bayan sang Dumangas, Iloilo kaangot sa postponement sang hearing nga nagatalakay sa reklamo ukon supplemental complaint batok sa bulangan sang Stephanie Coliseum.
Sa interview sang Bombo Radyo kay Dumangas, Iloilo Vice Mayor Ronaldo Golez, iya ginpahayag nga naka-schedule kuntani ang hearing kahapon nga adlaw, Pebrero 17, 2025, apang natabo-an nga wala nakaabot ang alkalde sang banwa nga si Mayor Braeden John Biron.
Suno kay Golez, nagpungko siya bilang acting mayor apang, nakulangan naman sang kwarto bangud ang session ang pagasakopan sang Committee of the Whole.
Ginpahayag man sini nga bangud sa alang-alang ang sitwasyon, nagdesisyon na lang sila nga i-reschedule ang amo nga hearing.
Gin-athag man ni Golez nga may mga tikang ukon recommendations na man sila nga ginpasa kay Mayor Biron bangud sa nagadugang na lang ang mga complaints batok sa Stephanie Coliseum.
Rason man nga ginsuspende ang bulangan sang duha ka semana sugod Pebrero 1 tubtob 14, 2025.
Nagpasalig man ang natungdan nga gilayon mapa-schedule subong nga semana ang amo nga concern agud mahatagan sang igtalupangod.
Una na nga ginpa-Bombo ang amo nga bulangan bangud sa ginaalegar improper use of municipal tax kag failure to complaint with documental requirements.
Ginkakabit naman sang complainant ukon ang nagpa-Bombo batok sa Stephanie Coliseum ang pag-abot sang sulat sang lokal nga pangulohan sang Dumangas nga naga-imbitar sa iya agud nga magtambong sang hearing subong nga adlaw.
Suno kay Rey Domines, ang nagpa-Bombo, iya ginpahayag nga naka-schedule man siya subong sa iya nga neurologist kaangot man sa iya ikaayong lawas.
Dugang sini nga daw nagulpihan man siya sa amo nga pagpatawag sa iya bangud nag-timing man nga may kaladtuan siya.
Nagalaum man ini nga hulaton siya sang Local Government sang Dumangas agud nga makatambong sa hearing.
Una na nga ginbuyagyag sang natungdan ang iya nga pagkadismaya sa nangin lihok sang LGU sang Dumangas batok sa Stephanie Coliseum.
Kon balikan, gin-alegar ni Domines nga nagapanukot ang Stephanie Coliseum sang tax collection nga P350 apisar P200 lang dapat ini.
Gintuad man sang natungdan nga sugod sang Oktubre tubtob Disyembre 2024, wala sila ka remit sang municipal tax rason nga nagpasaka ini sang complaint sang Disyembre 27, 2024.
