𝗜𝗟𝗢𝗜𝗟𝗢 𝗖𝗜𝗧𝗬 – Magapatigayon sang pagsinapol si Iloilo City Administrator Melchor Tan kag ang Department of Public Works and Highways-Iloilo City District Engr. Roy Pacanan kaangot sa mga wala natapos nga proyekto sa Iloilo City.
Sa interview sang Bombo Radyo kay Iloilo City Mayor Jerry Treñas, iya ginpahayag nga nakabaton sila sang mga reklamo sa pila ka mga residente kag barangay officials kaangot sa mga wala natapos nga mga multi-purpose gym projects sa syudad.
Tungod sini, ginmanduan niya si Tan nga makigsapol kay Pacanan agud masolusyunan ang problema.
Ini ang ginalakipan sang facilities sa Barangay Concepcion, City Proper, kag Barangay Katilingban, Molo, kag iban pa nga yara sa idalom sang Iloilo City District Engineering Office.
Magluwas diri, luyag man sini mahibaluan ang rason sang atrasado nga pagtapos sang Mandurriao Public Market nga ginpondohan sang national government.
Suno kay Treñas, nagpasalig sadto si Iloilo City Lone District Representative Julienne ‘Jamjam’ Baronda, apang sa indi mahibaluan nga rason, wala ini napadayon.
Magluwas diri, ginareklamo man sang alkalde ang wala natigayon nga sports complex sa sulod sang Jalandoni Memorial National High School.
Ginpahayag sang alkalde nga ang mga duta sa nasambit nga proyekto ang ginapanag-iyahan sang Iloilo City Government.
Apang kun wala na sang pondo, mas mayo suno sa natungdan nga i-turn over na lang ini sa Iloilo City Government agud mapangitaan sang pondo kag matapos ang mga proyekto.
