Nakuhaan sang 200 gramos nga ginapatihan shabu nga nagabalor sang ₱1,360,000 ang isa ka manugbaligya sang prutas sa ginpatigayon nga drug buy-bust operation sang Iloilo City Drug Enforcement Unit (CDEU), Iloilo City Police Station 4 (ICPS4), kag Regional Police Drug Enforcement Unit (RPDEU6) subong nga hapon sa Barangay San Juan, Molo, Iloilo City.
Ang subject amo si alyas ‘Bebot’, 57-anyos, may asawa, kag residente sang Barangay San Juan, Molo kag ginakabig bilang isa ka high-value individual (HVI).
Nakuha sa operasyon ang kabug-usan nga 11 ka plastik nga sachets kag tatlo ka knot-tied nga transparent plastic bags nga nagaunod sang mga shabu.
Ang suspek ang yara na subong sa kustodiya sang kapulisan kag magapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002.
Sa subong, ang Iloilo City Police Office (ICPO), nakarekord na sang 26 ka operasyon sa first half sang bulan nga nagresulta sa pagkarekober sang 656 gramos sang shabu nga may balor nga mga ₱4,460,800 kag pagkaaresto sa 33 ka mga drug personalities.
