Nanindugan ang Iloilo City Government nga indi tugutan nga makagamit sang duta sang syudad ang Iloilo City District Engineering Office kun indi maka-secure sang permit ukon consent halin sa syudad.
Sa interview sang Bombo Radyo kay Miss Joy Facinal Fantilaga, spokesperson ni Mayor Jerry Treñas, iya ginpahayag nga ini nga desisyon sang alkalde ang kaangot man sa natabo nga pagka-delay sang mga proyekto nga nagatindog sa mga duta nga ang syudad ang nagapanag-iya.
Suno kay Fantilaga, bangud sa mga delays sa pagkompleto sa sini nga mga proyekto, apektado ang kaayuhan sang mga pumuluyo bangud indi pa nila magamit ang mga pasilidad nga gintukod kuntani para sa ila.
Pahayag niya, sa subong, plano sang City Council nga magpasar sang resolusyon ukon magdihon sang ordinansa agud ma-obligar ang sin-o man nga mag-secure sang mga nagakaigo nga permits antes tugutan nga magpatukod sang proyekto.
Ini kasunod man sang ginpadala nga endorsement sang alkalde kay Vice Mayor Jeffrey Ganzon nga magpasar sang ordinansa ukon maghimo sang resolusyon agud nga ma-institutionalize ang proseso sang pag-secure sang clearance antes ang pagsugod sang mga engineering projects sa syudad.
