Nagpromisa ang Hamas militants nga ibalik na subong nga adlaw ang bangkay sang apat nga mga taga-Israel lakip na ang duha ka mga bata nga ila ginbihag sadtong Oktubre 7, 2023.
Ang duha ka kabataan, sanday Kfir kag Ariel, ang nagaedad sang siyam ka bulan kag apat ka tuig sang gin-kidnap halin sa southern Israel. Ibalik man ang lawas sang ila nga iloy nga si Shiri Bibas. Suno sa Hamas, napatay ang mag-iloy sang nag-atake ang Israel sa Gaza kun sa diin ginbihag sang mga militante ang mga Israeli. Wala ini ginkumpirma sang Israeli army.
Ang amay naman sang mga bata nga si Yarden ang nabuy-an na sang Hamas sini lamang nga bulan.
Magluwas sa apat ka mga bangkay, hilwayon man subong ang 83-anyos nga journalist nga si Oded Lifshitz.
Dugang dira, buy-an sang Hamas sa weekend ang apat ka mga buhi nga hostages. Bilang kabaylo, magapaguwa man ang Israel sang mga babaye nga naaresto halin sang Oktubre.
Kabahin ini sang una nga hugnat sang pag-release sang hostages kag prisoners/detainees bilang kabahin sang ceasefire agreement sa Gaza war.
