Ginsabat ni former Iloilo City Councilor Plaridel Nava ang mga pahayag ni Iloilo City Lone District Representative Julienne Baronda may kaangtanan sa mga isyu nga naangot sa mga delayed projects sa syudad.
Ini nga mga proyekto ang nagalakip sang Multi-purpose Building Project sa Concepcion, City Proper kag Mandurriao Public Market.
Kasunod ini sang pagbasol ni Baronda sa kontraktor sa Mandurriao Public Market nga suno sa mamalidha, nanghulam lang sang license agud makontrata ang amo nga proyekto rason nga nag-angkon sang problema kag na-delay.
Nahibaluan nga ang kontraktor sang Mandurriao Public Market amo ang J.E. Tico Construction Company, Inc. kag si Nava ang nagaserbe nga liaison officer kag consultant.
Sa interview sang Bombo Radyo kay Nava, iya ginpahayag nga ang sakop lang sang ila nga gin-bid amo ang una kag ikaduha nga panalgan sang merkado kang natapos nila ini kag indi na nila sakop ang ikatlo nga panalgan.
Suno sa iya, indi man sila obligado nga ubrahun ang third floor bangud nga wala man sang budget nga ginpain si Baronda para diri.
Samtang, isa man ka component sang proyekto ang sewerage treatment plant nga wala pa natapos asta subong.
Suno kay Nava, gin-ayo sila sang Department of Public Works and Highways nga maghimo sang design para diri bangud wala sang tinawo ang ahensya nga makahangop sa paghimo design.
Sa subong, ang kinahanglan na lang i-construct amo ang sewerage treatment plant apang gin-athag ni Nava nga indi sila ang cause sang delay.
Sa bahin sang Multi-purpose building project sa Concepcion, City Proper, ginpahayag ni Nava nga natapos nila kun ano ang nakasaad sa ila kontrata.
Suno sa iya, nakompleto nila ang Phase 1 bangud ini lang ang sakop sang ila scope of work.
Pahayag niya, wala na napadayon ini bangud wala man sang ginhatag nga budget si Baronda bangud suno kay Nava, akig sa iya ang mamalidha.
Nahibaluan nga ang kontraktor sa proyekto sa Concepcion amo ang Mandanas Construction kun sa diin si Nava ang authorized representative.
