Nagsungka sa otoridad ang subject sa buy bust operation nga ginpatigayon sa Trapiche, Oton, Iloilo.
Ang subject amo si Mike Cantera, singkwentahon ang edad, kag tumandok sang amo nga barangay.
Matandaan nga ginpatigayon ang operasyon sang Pebrero 19 sang gab-i apang samtang yara sa kustodiya sang kapulisan sa area kun sa diin siya nadakpan, hinali lang nga may nagpalupok sang pusil nga nag-igo sa isa ka pulis kag nangin kahigayunan agud makapalagyo kaupod ang ginapatihan nga himata sini nga nagpalupok sang armas-luthang.
Ang naigo nga pulis amo si Police Corporal Gilbert Lingaya nga nagaserbe nga backup, residente sang Barangay Damires, New Lucena, Iloilo kag yara na subong sa maayo nga kondisyon.
Nagsurrender si Cantera paagi kay Oton Mayor Sofronio Fusin, Jr.
Sa interview sang Bombo Radyo kay Fusin, iya ginpahayag nga una siya nga nakabaton sang feeler nga masungka si Cantera.
Suno sa alkalde, gilayon sila nga nagpakig-angot sa pamilya sa bulig man sang opisyal sang barangay kag ginpasiguro ang safety ni Cantera sa tion nga magsungka ini.
Matapos ang negosasyon, gindala sang pamilya si Cantera sa munisipyo kag nag-atubang sa alkalde kag sunod nga gin-turn over sa kapulisan.
Ginpaidalom naman sa medical check-up si Cantera bangud may mga pilas ini kag nagapalanglapsi.
Samtang, nagapabilin naman nga at large ang kaupod niya nga nagpalagyo nga amo ang nagpalupok sang pusil kag may dala nga granada.
