Ginalauman nga mapatindog sa Iloilo City ang isa ka desalination plant nga maka-produce sang tubtob 65.5 million liters sang potable water kada adlaw.
Ini nga proyekto ang ginpatigayon sa pagpanguna sang Metro Pacific Iloilo Water (MPIW), nga bug-os nga ginapanag-iyahan ang water infrastructure investments subsidiary sang Metro Pacific Investments Corporation (MPIC) kag naselyohan ang kasugtanan upod ang French company Suez para sa pagtukod sang planta.
Sa interview sang Bombo Radyo kay Angelo David Berba, chief operating officer sang Metro Pacific Iloilo Water, iya ginpahayag nga tinutuyo sang nasambit nga pasilidad nga patindugon sa Barangay Ingore sa distrito sang La Paz nga masabat ang nagataas nga demand sang tubig sa Metro Iloilo.
Suno kay Berba, ang P5.5-billion nga desalination plant sa syudad ang target nga mangin operational sa first quarter sang 2027 nga naga-convert sang seawater sa fresh potable water, makabenepisyo sa masobra 400,000 ka mga pumuluyo sang syudad.
Ginalauman ang proyekto nga makahatag benepisyo sa 50,000 ka mga panimalay.
Ang desalination amo ang paghimo sang tubig dagat nga mangin tubig ilimnon. Ang proseso nagapain sang natunaw nga mga asin kag iban pa nga mga mineral gikan sa tubig paagi sa proseso sang reverse osmosis.
Nahibaluan nga ang water distributor ang nga nagapanagtag sang tubig sa syudad sang Iloilo kag sa mga banwa sang Oton, Sta. Barbara, Cabatuan, Maasin, San Miguel, Pavia, kag Leganes.
