Nag-updanay ang Pilipinas kag France sa military drills sa West Philippine Sea, Pebrero 21.
Nag-upod sa maritime cooperation activity ang aircraft carrier sang French Navy nga Charles De Gaulle, Fregate Europeenne Multi-Mission Destroyer Provence, Force Supply Vessel Jacques Chevallier, Air Defense Destroyer Forbin, kag Aquitaine-class frigate Alsace.
Sa bahin sang Armed Forces of the Philippines (AFP), ginpadala ang BRP Jose Rizal, BRP Gregorio del Pilar, C90 aircraft kag duha ka FA50s.
Suno kay AFP Chief General Romeo Brawner, Jr., tuyo sini nga drill nga mapapag-on ang depensa sang militar kag makapreparar nga masabat ang nagkalain-lain nga pagpanghangkat sa seguridad sang pungsod sa modern nga panahon.
“Through joint maritime cooperative activities and collaborative efforts, the AFP seeks to build a stronger, more resilient defense system that is prepared to address the challenges of the modern security landscape,” kabahin sang statement.
Ginhimo ini nga bilateral activity samtang ginapadayon pa ang negosasyon sa visiting forces agreement (VFA) sa tunga sang Manila kag Paris.
Paagi sa sini nga kasugtanan, matugutan ang military training kag operasyon kag mas daku nga joint exercises sa tunga sang duha ka nasyon.
Matandaan nga sang 2024, sa labing-una nga tion, nagpasakop ang France sa four-day joint patrol sa West Philippine Sea kadungan sang tuigan nga Balikatan exercises sang Pilipinas kag Estados Unidos sang Amerika.
