Ginkumpirma sang Pavia Municipal Police Station (MPS) nga nakaguwa na sa Iloilo ang duha sa tatlo ka Indian nationals nga suspek sa pagtiro-patay kay Pastor Douglas Jover sa Brgy. Anilao, Pavia, Iloilo sang Enero 10, 2025.
Sa interview sang Bombo Radyo kay Police Lieutenant Gabriel Manguera, Deputy Chief of Police sang Pavia Municipal Police Station (MPS), iya ginpahayag nga base sa ila monitoring, nakagwa na ang duha, samtang nagapabilin sa Iloilo ang isa ka suspek.
Ginahulat naman sang kapulisan ang warrant of arrest para sa tatlo ka indian nationals agud matigayon ang mga ini nga madakpan.
Una na nga gintuad sang Pavia PNP nga utang nga P300,000 sa online crypto currency ang isa sa motibo kon ngaa ginpatay ang pastor.
Ginbuyagyag man sang otoridad nga ang mga suspek ang naga-istar sa isa lamang ka apartment sa Iloilo City.
Nahibaluan nga nag-agum ang pastor sang igo sang bala halin sa ulo kag naglapos sa sag-ang sini nga gintunaan man sang iya kamatayon.
