Indi na makabalik subong nga season ang all-time winningest coach sa NBA nga si Gregg Popovich kasunod sang stroke nga ginsuprer sini sang Nobyembre 2.
Base sa report sang ESPN, indi man klaro kun ano ang future para kay Popovich bilang head coach sang San Antonio Spurs.
Matandaan nga ginkumpirma sang team nga na-mild stroke ang 76-anyos nga coach matapos ang lima lamang ka hampang subong nga season. Kasunod sang natabo sa iya sa Frost Bank Center, ginsiling pa anay sang team nga nagapaidalom ini sa rehabilitation kag ginalauman ang iya nga “full recovery.”
Siya ang pinakatigulang nga coach subong sa liga. Siya man ang nagpanguna sa sa San Antonio halin pa sang 1996-97 season kag nakadaog na sang lima ka NBA championships.
Kasunod sa problema sa iya ikaayong lawas, gin-promote si Spurs assistant coach Mitch Johnson bilang interim head coach kag nakuha ang 22-27 record (as of press time) sa iya pagpanguna sa team.
Dugang man nga problema ang ginbatyag sang Spurs sang ginkumpirma nga indi naman makahampang sa nabilin nga season ang star big man nga Victor Wembanyama bangud sa blood clot sa tuo nga abaga.
