Dako ang posibilidad nga indi anay pagpatudluon ang manunudlo sang Fort San Pedro National High School kasunod nga ginpa-Bombo sang isa ka ginikanan bangud sang indi sini pagpahanugot sa pila ka mga estudyante nga magkuha sang exam.
Ini kasunod man sang wala nakapasa sang school project ang mga estudyante.
Sa interview sang Bombo Radyo kay Dr. Ma. Luz Delos Reyes, Iloilo City Schools Division Superintendent, iya ginpahayag nga nagtipon sila sang dugang nga detalye agud matumod ang aktwal nga natabo.
Suno kay Reyes, may ginakaptan na siya nga dokumento nga nagaunod sang incident report nga ginpasa sang nasambit nga buluthuan.
Gintuad man sini nga ang pila ka estudyante ang gin-istorya sang guidance counselor kasunod sang insidente.
Gin-athag man sang natungdan nga wala sang ‘formal administrative complaint’ nga ginpasaka sa ila sang nagpa-Bombo.
Mangin basehan man ni Delos Reyes ang report agud matumod kon may natuga gidman nga indi maayo ang manunudlo kag kon mapatud-an, mahimo ini i-pull out sa klase.
Ginbuyagyag man sini nga may report ang mga estudyante nga ginahambalan sila sang indi manami nga tinaga kag ginapahog sang manunudlo.
Magapakig-istorya naman si Delos Reyes sa manunudlo kag sa legal nga bahin agud nga indi na pa magdako pa ang amo nga insidente.
Una na nga gintuad sang ginikanan nga nagpa-Bombo nga magluwas sa iya anak, may 9 ka iban pa nga mga estudyante nga wala man ginpakuha sang exam.
