Gin-athag sang Iloilo Police Provincial Office (IPPO) nga wala sang kamatuoran ang kidnapping incident nga naglapta sa syudad kag probinsya sang Iloilo.
Sa interview sang Bombo Radyo kay Police Major Rolando Araño, spokesperson sang IPPO, iya ginpahayag nga sa ila pagpatuman sang madalom nga imbestigasyon, nagaguwa nga wala sang basehan ang mga nagalapta nga impormasyon nga may kidnap nga nagakatabo sa probinsya kag syudad.
Suno kay Araño, sa amo nga mga hitabo, ang IPPO naghimo sang proactive measures agud masabat ang sitwasyon. Ang tanan nga mga kumander sang yunit ginhingyo nga makig-angot sa mga otoridad sang eskwelahan sa pagtudlo sa mga estudyante sa importansya sang pag-verify sang impormasyon, ilabi na gikan sa social
media.
Nagpasalig man ang talatapan nga committed sila sa pagpasanyog sang ihibalo sang publiko nahanungod sa katalagman sang pagpati kag pagpalapnag sang peke nga balita.
Dugang pa, ginadugangan man sang IPPO ang police visibility sa mga eskwelahan kag naga-coordinate sa Liga ng mga Barangay agud ma-mobilize ang mga Barangay Tanod para sa enhanced community safety.
Makahalanusbo para kay Araño nga ang iban nga indibidwal iresponsable nga nagapaambit sang nagapatalang nga impormasyon online, nga wala ginasapak ang posible negatibo nga epekto sa komunidad.
