Nagapati ang pila ka youth organizations nga isa ka insulto ang pagdeklara sang special working day sa anibersaryo sang EDSA People Power Revolution.
Sa interview sang Bombo Radyo kay Matthew Gonzaga, Convenor sang Anak Bayan Western Visayas Youth Alliance, iya ginpahayag nga dapat ang tagsa ka buluthuan sa Iloilo ang manindugan agud nga kilalahon ang ika-39 nga anibersaryo sang EDSA People Power.
Suno kay Gonzaga, ang kahimtangan sang pungsod subong ang madamo sang ginaatubang nga mga problema lakip na ang korapsyon.
Gintuad man sini nga kinahanglan pasabton ang mga politiko nga nagalustay sang kwarta sang pumuluyo.
Ginpamatukan man ni Gonzaga ang pagpahanugot sa nangin ruling sang korte nga nagapahanugot sa commercial fishing vessels nga makasulod sa municipal waters sang Iloilo.
Para sa natungdan, nagapatay ini sa palangabuhian sang tagsa ka manugpangisda.
Ginbuyagyag man sini nga dako nga tampa sa pumuluyo ilabi na sa mga nagsakripisyo sang kabuhi ang pagdeklarar sang Pebrero 25 nga working holiday.
