Gindagdagdan sang memorandum sang Iloilo City Schools Division agud indi anay makatudlo ang manunudlo nga ginpa-Bombo bangud wala naghatag sang exam sa iya mga estudyante sa Fort San Pedro National High School.
Sa interview sang Bombo Radyo kay Dr. Ma. Luz Delos Reyes, Iloilo City Schools Division Superintendent, iya ginpahayag nga lain na lang anay nga manunudlo ang maga-handle sang iya subject nga ginatudlo-an samtang padayon ang imbestigasyon.
Suno kay Reyes, indi lang anay pagpa-atubang ang manunudlo sa mga estudyante agud indi ma-trauma ang mga kabataan.
Nagpabilin naman nga wala sang ‘formal administrative complaint’ nga ginpasaka sa ila sang nagpa-Bombo.
Una na nga ginbuyagyag sang natungdan nga may report ang mga estudyante nga ginahambalan sila sang indi manami nga tinaga kag ginapahog sang manunudlo.
Nahibaluan nga gintuad sang ginikanan nga nagpa-Bombo nga magluwas sa iya anak, may 9 ka iban pa nga mga estudyante nga wala man ginpakuha sang exam.
