Nasapwan nga wala na sang kabuhi sa sulod sang ila puluy-an sa New Mexico, USA ang beterano nga aktor nga si Gene Hackman, 95, iya asawa nga si Betsy Arakawa, 63, kag ang ila isa ka ido.
Base kay Santa Fe County Sheriff Adan Mendoza, wala sang immediate indication nga may natabo nga foul play.
Wala pa sang dugang nga detalye nga gin-release ang pulis kaangot sa rason sang ila nga kamatayon. Padayon man ang imbestigasyon.
Kilala si Hackman nga nakadaog sang duha ka Academy Awards sa violent 1971 drug saga nga “The French Connection” kag 1992 western “Unforgiven”.
Isa siya ka former Marine nga nakit-an sa masobra 80 ka mga pelikula amo man sa telebisyon kag sa entablado sa malawig nga karera nga nagsugod sadtong 1960s.
Lima ka beses siya nga na-nominate sa Oscars bangud sa iya abilidad sa pag-arte, lakip na ang pagdala sang papel sang villain, hero, kag anti-hero sa dramas, comedies, kag action films tubtub sa iya early retirement sang early 2000s.
May tatlo siya ka kabataan sa una niya nga asawa. Ginkasal siya kay Arakawa nga isa ka pianist sadtong 1991.
