Nagtukod sang tracker team ang Iloilo Police Provincial Office (IPPO) kasunod sang nagadamo nga kaso sang hold up sa Iloilo.
Sa interview sang Bombo Radyo kay Police Colonel Bayani Razalan, Provincial Director sang IPPO, iya ginpahayag nga nagmando na sila sa Provincial Intelligence Unit agud mag-focus sa nagasangakad nga kaso sang pagpang-holdup.
Suno kay Razalan, tinutuyo sang tikang nga mapapas ang sunod-sunod nga nagaluntad nga insidente sang pagpangawat sa Iloilo.
Nagpasalig man ini nga padayon ang pag-track down sang otoridad sa mga aktibidad sa probinsya.
Nahibaluan nga santu sa data sang Iloilo Police Provincial Office, sa sulod lang sang bulan sang Pebrero 2025, nakarekord na ini sang apat ka mga holdup incidents lakip na ang sa Pavia sang Pebrero 10 sa diin nakuha sang mga suspek ang P300,000 nga benta sang fuel tanker sang Metro Iloilo Transport Service Cooperative.
