Pabaskugon pa ang security protocols sa Malacañang matapos nadakpan ang duha ka Chinese nationals kag tatlo ka mga kahimbon nga mga Pilipino nga ginaalegar nagapang-espiya malapit sa palasyo.
Suno kay Presidential Communications Office (PCO) Undersecretary kag Malacañang Press Officer Atty. Claire Castro, makaalarma ini nga ginaalegar espionage activities nga nakalab-ot na subong sa compound sang Malacañang.
Magluwas sa seguridad sa Palasyo, mas hugton man ang pagbantay kay President Ferdinand Marcos, Jr.
Base sa anunsyo sang National Bureau of Investigation (NBI), nadakpan ang lima ka ginasuspetsahan nga espiya sang nagligad nga Pebrero 20.
Naaresto sila matapos gin-alerto ang awtoridad sang makaduluda nga mga salakyan nga may international mobile subscriber identity (Imsi) catchers malapit sa Malacañang, sa headquarters sang Armed Forces of the Philippines kag Philippine National Police sa Quezon City, kag mangin sa US Embassy sa Manila.
Ang IMSI catchers amo ang nagaserbe nga peke nga cell towers sa tunga sang mobile phones kag tower sang original network provider gani nga ma-intercept ang mga mensahe para sa unauthorized surveillance, pagpamati-bati, data theft, kag network disruption.
Una nga nadakpan amo ang mga Pinoy nga ginpangkilala nga sanday Omar Khan Joveres, Leo Panti kag Mark Angelo Binza. Ginbulgar nila ang ginsugo lang sila sang Chinese national nga si Ni Qinhui kag ginswelduhan sang P2,500 tubtub sa P3,000 kada adlaw.
Suno sa tatlo, ginsugo sila nga i-maneho ang salakyan nga may Imsi catchers malapit sa amo nga government installations sa Metro Manila.
Sa ginpatigayon naman nga follow-up operation, nadakpan si Ni kag ang isa pa ka Chinese national nga si Zheng Wei sa condominium unit sa Malate, Manila.
Matandaan nga sang Enero, nadakpan man sang NBI ang lima ka suspected Chinese spies nga naga-monitor man sang aktibidad sang Philippine Coast Guard (PCG) kag Philippine Navy sa Palawan lakip na ang resupply sang tropa sa West Philippine Sea.
