Nagtukod sang impeachment Secretariat ang Kamara nga magahatag sang technical kag administrative support sa 11-man House prosecution team sa impeachment trial ni Vice President Sara Duterte.
Ini ang base sa Memorandum Order 19-1006 nga ginpagwa ni House Secretary General Reginald Velasco.
Suno kay Velasco, may importante nga papel ang impeachment Secretariat sa paghatag sang kinahanglanon nga logistical, research kag documentation support sa House prosecution team.
Ang impeachment Secretariat ginabug-usan sang mga tiglawas halin sa Office of the Secretary General, Office of the Sergeant at Arms, Legislative Operations Department, Legal Affairs Department kag iban pa nga may kaangtanan nga yunit sang Kamara.
Suno kay Velasco, ang ila papel amo ang paghatag sang plenary support, legal research, records management, stenographic transcription, information technology, security kag administrative coordination.
Ang mga assigned officers kag employees ang magasunod sa istrikto nga pagsulundan kag ethical guidelines sang Kamara.
Nagapati naman si Manila 3rd District Rep. Joel Chua, katapo sang 11-man House Prosecution Team, ang pagtukod sang House Secretariat, ang bilang suporta sa ila sa impeachment trial batok kay VP Duterte.
Ginpasalig naman ni Chua nga handa na ang prosecution team sa impeachment proceedings.
Natalana nga magsapol sa masunod nga mga inadlaw ang 11-man House Prosecution Team upod sa mga katapo ukon staff sang bag-o natukod nga House Secretariat agud ma-iron out ang mga bagay may kaangtanan sa pagsugod sang impeachment trial batok kay VP Sara Duterte.
