“Maayo man madayon, maayo man kon indi.” Ini ang nangin sentyemento sang pila ka mga vendors sa Iloilo Terminal Market sa posibilidad nga makasaylo sila kasunod sang padayon nga konstruksyon sang pasilidad.
Sa interview sang Bombo Radyo kay Oque Gascon, Presidente sang Terminal Market Vendors Association, iya ginpahayag nga excited ang pila ka mga vendors sa pagpasalig sang city government nga sila ang makasaylo sa bulan sang Mayo.
Suno kay Gascon, pila sa mga vendors ang nagapanghakroy sa ila nga sitwasyon subong, ilabi na kon mag-inulan-ulan.
Gipahayag man sini nga lakip sa mga problema nga ginapalab-ot sa ila amo ang indi maagwantahan nga pagkinawatay sa merkado.
Una nga nagpasalig presidente sang Iloilo Terminal Market nga ang Market Police ang nagalibot sa merkado agud nga mapabilin nga hilway ini sa kawatan.
Nahibaluan nga sang damlag lang man, gin-isdog ang pila ka fish vendors sa amo nga merkado kasunod sang himuon nga sewerage treatment plan.
Madumduman nga una nagpahayag ang Chief sang Local Economic Enterprise Office nga si Maricel Mabaquiao nga medyo na-delay ang paghuman sa merkado bangud sa pagkuha sang mga materyales apang posible nga sa bulan sang Mayo mabuksan kag magamit.
