DINGLE, ILOILO – Nagpatigayon sang pagsinapol ang Archdiocese of Jaro kag Local Government Unit sang Dingle, Iloilo may kaangtanan sa ginaduso nga road widening sa diin ginaalegar madalasa ang semicircular nga hagdan sang historic nga St. John the Baptist Church.
Ang ginapahayag plano nga pag-demolish sang hagdan sang simbahan ang nagresulta sang pagkabalaka sang pila ka mga heritage advocates bangud may yara sang historical kag cultural significance ang simbahan.
Ang St. John the Baptist Church sa Dingle ang gintukod sang Spanish colonia era pa sa diin human sa granite stone ang nasambit nga simbahan nga gin-quarry malapit sa kabukiran sang Bulabog Putian.
Ginpakig-angotan sang Bombo Radyo si Father Angelo Colada, ang director sang Social Communications Office sang Archdiocese of Jaro, kag iya ginkumpirma nga nakapakig-angot na ang simbahan sa local government unit sang Dingle natuhoy sa plano.
Pahayag niya, sa subong, ginhatagan na sang Roman Catholic Archbishop of Jaro kag Archdiocesan Property Administration Office ang local government unit sang Dingle sang records sa duta nga subject sa ginaduso nga road widening.
Dugang pa sang natungdan, padayon nga nagapakig-angot ang simbahan kag ang legal team sini sa local government unit sang Dingle agud makahimo sang “mutually acceptable solution” sa amo nga concern.
Nahibaluan nga ang St. John the Baptist Church ang yara sa idalom sang hurisdiksyon sang Archdiocese of Jaro.
Bukas naman ang Bombo Radyo sa paathag sang Local Government Unit sang Dingle.
