Ginbawian na sang kabuhi ang driver sang motorsiklo nga nabungguan sang kotse sa Sunset Boulevard nga sakop sang Sooc, Arevalo sang Pebrero 27, 2025.
Ang driver sang motorsiklo amo si Jonazardo Abong, 26-anyos, isa ka criminology board passer, kag residente sang Sooc, Arevalo.
Sa interview sang Bombo Radyo kay Police Senior Master Sergeant Toto Karl Petalco, Imbestigador sang Traffic Enforcement Unit (TEU), iya ginpahayag nga ginbawian kagina sang aga ang driver sang motorsiklo samtang nga ginabulong sa ospital bangud sa naagum sini nga head injury kag pilas sa nagkalain-lain nga parte sang lawas.
Sa subong, padayon ang negosasyon sa tunga sang duha ka pamilya nga involved sa amo nga aksidente kun sa diin, una na nga ginpahayag nga sabton sang driver sang salakyan ang medical expenses sang driver sang motorsiklo.
Nahibaluan nga naghalin sa Mandurriao ang kotse samtang halin naman sa Gloryville Subdivision ang motorsiklo sang natabo ang aksidente.
Santo sa pahayag sang mga testigo, nagtumpilak gid ang biktima kag ginyudyod pa sang kotse ang motorsiklo.
Buka naman ang unahan nga parte sang kotse kalakip na ang windshield sini.
