Gindeklarar nga kampyon ang Grupo Ilonggo De Saltatores sang Jalandoni Memorial National High School sa ginpatigayon nga Sinamba sa Regatta.
Isa ini sa highlights sang 52nd Iloilo-Guimaras Paraw Regatta Festival nga nagpakita sang ila maduagon nga performances kahapon, Marso 1.
Magluwas sa kampyonato, nakuha man sang grupo ang awards nga Best in Street Dance, Best in Original Composition, Best in Music, Best in Performance, kag Best in Choreography.
Nangin first runner-up naman ang Grupo Del Oeste sang West Visayas State University (WVSU) nga amo man ang nakadala-pauli sang award nga Best in Duo Performance.
Nangin 2nd runner up ang Grupo Bailarines Del Manduryaw sang Manduriao National High School. Sa ila man nagkadto ang Best in Production Design kag Best in Costume.
Nagkadto naman sa Grupo Baile Del Obreros sang Bo. Obrero Lapuz ang Most Disciplined award.
Ang tema sang festival subong nga tuig amo ang “Sailing Blue Waters on This Green Earth.” Ginapakita sini ang manggaranon nga maritime heritage sang Iloilo kag ang commitment sini sa pagtipig sa palibot ukon ang environmental conservation.
Subong nga Domingo amo ang katapusan nga adlaw sang festival kun sa diin balantayan ang Paraw Main Race, Pinta Layag, Pinta Tawo, Sinamba Street Dancing, ang Lighted Paraw showcase, kag ang Lechon Parade and Contest. (Photo: Jerry Treñas Official)
