Nagpanawagan ang isa ka myembro sang House prosecution team sa mga senador nga unahon ang impeachment trial ni Vice President Sara Duterte nga isa ka pamaagi sa idalom sang Konstitusyon agud manabat ang opisyal sang gobyerno.
Ginsuportahan ni Manila Rep. Joel Chua, chairman sang House Committee on Good Government and Public Accountability, ang panawagan sang Caritas Philippines, sa pagpanguna ni Bishop Jose Colin Bagaforo, nga dapat siguraduhon sang Senado ang madasig kag patas nga pag-uyat sang kaso batok sa Bise Presidente nga ginapahayag isa ka nasyonal nga isyu nga nagakinahanglan sang gilayon nga atensyon.
Suno kay Chua, husto ang panawagan sang Caritas Philippines, ang social action arm sang Catholic Bishops Conference of the Philippines (CBCP) sa mga senador.
Liwat nga ginpahayag sang impeachment prosecutor nga ang mandato sang Senado nga “forthwith proceed” sa pagbista kay VP Duterte ang wala lamang nakasaad sa Konstitusyon kundi naghalin man ini sa mga tawo nga nag-ratipikar sang Konstitusyon.
Samtang, ginpahayag ni Deputy Majority Leader Paolo Ortega V sang La Union nga itugyan niya sa senado ang desisyon angot sa importansya sang gilayon nga hearing sa kaso sang impeachment.
Nagpagwa sang pahayag ang Caritas Philippines sang Huwebes agud ipabutyag ang ila panawagan sa Senado.
Suno sa CBCP social action arm, luyag nila nga hatagan-importansya ang mga alegasyon sang korapsyon, pag-abuso sa poder, kag kapabayaan sa serbisyo publiko nga dapat imbestigaran nga may pareho nga igtalupangod sang bisan ano man nga krimen.
