Nagpagwa sang bag-o nga mando ang Department of Trade and Industry nga nagarequire sa online sellers sang mga household appliances, electronics kag iban pa nga mga consumer goods nga magparehistro sa ahensya.
Sa idalom sang Department Administrative Order (DAO) 25-02 nga gin-aprubahan sang Pebrero 21, ang DTI nagsiling nga ang mga online merchants kag e-retailers nga nagabaligya sang mga produkto sang mga konsumidor nga napaidalom sa mandatory certification gikan sa Bureau of Philippine Standards (BPS), dapat magkumpleto sang isa ka beses nga pagparehistro paagi sa online portal sang bureau.
Ang mga produkto nga subject sa mandatory certification amo ang mga kinahanglan nga may marka sang Philippine Standard (PS) ukon Import Commodity Clearance (ICC) antes ibaligya sa merkado agud masiguro nga ini nagasanto sa nagakaigo nga mga pagsulundan sang kalidad kag safety standards.
