Gin-athag sang Korte Suprema nga nga indi na kinahanglan ang Psychiatric records agud pamatud-an ang isa ka legal insanity.
Sa interview sang Bombo Radyo kay Atty. Alfredo Arungayan III, Bombo Abogado, iya ginpahayag nga wala na nagakinahanglan sang dokumentado nga pamatuod nga may sakit sa panghuna-huna ang isa ka tawo agud magamit sa legal insanity bilang depensa sa isa ka kaso.
Suno kay Arungayan, sa idalum sang Article 12 sang Revised Penal Code, ang isa ka tawo nga nakahimo sang krimen kag napamatud-an nga legal nga may sakit sa paminsaron ang exempted sa criminal liability.
Dugang pa sang Korte nga mabudlay pamatud-an ang amo nga sakit sa amo nga tion sang krimen, gani mahimo nga binag-binagon sang korte ang pamatasan sang akusado antes ukon pagkatapos sang insidente.
Ginklaro man sang Korte nga samtang ang mga nauna nga rekord medikal mahimo nga may kaangtanan, indi nila kinahanglan nga pamatud-an nga ang medikal nga kondisyon sang akusado amo ang kabangdanan sang krimen.
Samtang, ang wala sang dokumentado nga psychiatric history, indi dapat paggamiton batok sa akusado.
