Nagtupa sa lockup cell sang Pavia Municipal Police Station ang 26 ka mga indibidwal matapos nga nadakpan nga iligal nga nagapauwak sa Brgy. Pandac, Pavia, Iloilo.
Sa interview sang Bombo Radyo kay Police Lieutenant Gabriel Manguera, Deputy Chief of Police sang Pavia Municipal Police Station, iya ginpahayag nga una na nga nakabaton sang report ang talatapan nga may ginapatigayon nga pauwak sa amo nga lugar rason nga nagpatuman sila sang operasyon.
Suno kay Manguera, nakuha sa amo nga operasyon ang duha ka cockfighting rings, 15 ka mga manok, wall clock, duha ka syringe, kag P9,100 nga bet money.
Yara na sa paghinakop sang Pavia PNP ang nagkaladakpan kon sa diin, nagapangatubang sang kaso sa paglapas sa Presidential Decree 1602 ukon Anti-Illegal Gambling Law.
